魚皮一哥(順德篇)
华盖里直街2号之一1号铺
順德食撈魚皮已經好出名，除咗大良炸鮮奶雙皮奶，撈魚皮都算係順德名物，清暉園步行街賣撈魚皮嘅店就真係好多，好多店我都食過大致係好食嘅，不過最出色嘅，就真係呢間魚皮一哥，真係實至名歸，我去咗五日順德食咗兩次魚皮一哥，有4種魚皮任你揀，分別係鯇魚皮，鯪魚皮，海鱸魚皮，同羅非魚皮，我叫咗個四拼，其實4種魚皮分別係脆度都唔同，最脆係鯇魚皮，海鱸魚排第2，鯪魚皮第三，最後係羅非魚皮，不過口感係個人喜好。但呢間店嘅調味真係做得好好。鯇魚皮應該係全條街最脆口，我太太過年時去到順德，排長龍都要食呢間鯇魚皮，我太太係一個絕對唔鍾意排隊嘅人，可想而知呢間魚皮嘅魔力係有幾大！
總結，四拼魚皮一大盒58人仔，單一款魚皮25-38人仔，任君選擇，鹹魚青菜各有所愛。不過我建議淨食鯇魚皮，因為真係脆口到牙都甩，閑日就唔需要點排隊，一到週五六日就不得之了，不過真係排隊都要食！其他喺步行街嘅食店我建議就唔需要幫襯，除咗民信甜品總店，因為祇有呢間民信總店先會有一啲特色嘅甜品，遲下再介紹啊。
